*విజయసాయిపై మాజీ మంత్రి గుడివాడ ఫైర్ :
వైఎస్సార్ కాంగ్రెస్ పార్టీ (వైసీపీ) మాజీ మంత్రి గుడివాడ అమర్నాథ్, పార్టీ రాజ్యసభ సభ్యుడు విజయసాయి రెడ్డి వ్యాఖ్యలపై తీవ్రంగా స్పందించారు. విజయసాయి రెడ్డి ఇటీవల రాజకీయాల నుండి విరమించుకుంటున్నట్లు ప్రకటించి, వ్యవసాయం చేయాలని నిర్ణయించుకున్నారు. అయితే, ఆయన ఢిల్లీలో మాట్లాడిన మాటలు, విజయవాడలో మాట్లాడిన మాటల మధ్య తేడా ఉందని అమర్నాథ్ పేర్కొన్నారు. అలాగే, విజయసాయి రెడ్డి వ్యవసాయం చేయరని, రాజకీయమే చేస్తారని ఆయన వ్యాఖ్యలతో అర్థమైందని వ్యాఖ్యానించారు.
అమర్నాథ్ మాట్లాడుతూ, “ఒక నాయకుడు వెళ్లిపోతే, మరొక నాయకుడిని తయారు చేయడం జగన్‌కు తెలుసు. పార్టీ మారే వారికి సముదాయిస్తాం కానీ, కాళ్లు పట్టుకోలేం” అని స్పష్టం చేశారు. అంతేకాక, “ఒక్క మనిషి పోతే రాజకీయాలు ఆగవు” అని అన్నారు.
అమర్నాథ్, చంద్రబాబు నాయుడు 40 ఏళ్ల రాజకీయ జీవితంలో చెప్పిన మాటలను ఎప్పుడూ చేయలేదని విమర్శించారు. అయితే, విజయసాయి రెడ్డి వ్యాఖ్యలపై అమర్నాథ్ చేసిన ఈ కౌంటర్, పార్టీ అంతర్గత విభేదాలను సూచిస్తోంది.
