ఏపీలో 18 ఫ్లైఓవర్లు.. ఎక్కడెక్కడంటే.? కేంద్ర మంత్రి నితిన్ గడ్కరీ ప్రకటన
ఆంధ్రప్రదేశ్‌లో కేంద్ర ప్రభుత్వం చేపడుతున్న రహదారి ప్రాజెక్టుల గురించి కేంద్ర రోడ్లు, రవాణాశాఖ మంత్రి నితిన్ గడ్కరీ పార్లమెంట్ సమావేశాల్లో ప్రకటన చేశారు. లోక్‌సభలో వైసీపీ ఎంపీ మిథున్ రెడ్డి అడిగిన ప్రశ్నకు సమాధానం ఇచ్చిన నితిన్ గడ్కరీ.. ఏపీలో కేంద్రం చేపడుతున్న రహదారి ప్రాజెక్టుల పరిస్థితిని వివరించారు. ఆంధ్రప్రదేశ్‌లో రూ.1.046 కోట్లతో జాతీయ రహదారులపై 18 ఫ్లైఓవర్లు నిర్మిస్తున్నట్లు నితిన్ గడ్కరీ చెప్పారు. ఈ 18 ఫ్లైఓవర్లు నిర్మాణ దశలో ఉన్నాయంటూ లోక్‌సభలో వెల్లడించారు.
ఎన్హెచ్ – 16 జాతీయ రహదారి
ఎన్ హెచ్-16పై గొలగమూడి జంక్షన్, నెల్లూరు టీ జంక్షన్ వద్ద రెండు ఫ్లైఓవర్లు నిర్మిస్తున్నామన్న కేంద్ర మంత్రి.. 2025 సెప్టెంబర్‌ 11కి ఆ వంతెనల నిర్మాణం పూర్తవుతుందని చెప్పారు. అలాగే రాజుపాలెం జంక్షన్, నాగులప్పలపాడు గ్రోత్ సెంటర్ల వద్ద ఫ్లైఓవర్ల నిర్మాణానికి పర్మిషన్ ఇచ్చినట్లు లోక్‌సభలో వెల్లడించారు. అలాగే జొన్నతాళి క్రాస్ రోడ్డు, రాజుపాలెం క్రాస్ రోడ్డు, రణస్థలం టౌన్ పోర్షన్, చెవ్వూరు క్రాస్ రోడ్ల వద్ద కూడా ఫ్లైఓవర్లు నిర్మించనున్నట్లు చెప్పారు. వీటికోసం టెండర్లు పిలిచినట్లు చెప్పారు. అలాగే శ్రీసిటీ జీరోపాయింట్, చిల్లకూరు సెంటర్ వద్ద ఇదే హైవే మీద ఫ్లైఓవర్లు నిర్మించాల్సి ఉందని.. ఇందుకోసం టెండర్లు పిలవాల్సి ఉందని కేంద్ర మంత్రి లోక్ శభలో వివరించారు.
ఎన్ హెచ్6A జాతీయ రహదారి విషయానికి వస్తే ఉండ్రాజవరం జంక్షన్, జొన్నాడ, మోరంపూడి, కైకరం, తేతలి వద్ద కేంద్ర ప్రభుత్వం ఐదు ఫ్లైఓవర్లు నిర్మిస్తోంది. ఈ ఫ్లైఓవర్ నిర్మాణాలు 2025 ఏప్రిల్ 2 నాటికి పూర్తవుతాయని కేంద్ర మంత్రి నితిన్ గడ్కరీ చెప్పారు. నిర్దేశిత లక్ష్యంలోపు పనులు పూర్తి చేసేలా అధికారులను ఆదేశించినట్లు వివరించారు. మరోవైపు గుంటూరు మిర్చియార్డు వద్ద ఫ్లైఓవర్ నిర్మాణాన్ని 2025 జనవరి ఆరో తేదీనాటికి పూర్తిచేసేలా పనులు చేపడుతున్నట్లు చెప్పారు విశాఖపట్నం ఎయిర్‌పోర్టు జంక్షన్ వద్ద నిర్మిస్తున్న ఫ్లైఓవర్ నిర్మాణాన్ని 2025 ఫిబ్రవరి 15కి పూర్తిచేయాలని లక్ష్యంగా పెట్టుకున్నట్లు వివరించారు. మరోవైపు ఎన్హెచ్-44పై కియా వద్ద ఫ్లైఓవర్ నిర్మాణానికి బిడ్లు ఆహ్వానించినట్లు కేంద్ర మంత్రి నితిన్ గడ్కరీ వెల్లడించారు.
